Vimianzo celebrará un Entroido ‘terrorificamente divertido’ con máis de 2.800 euros en premios
A gran festa de disfraces de Vimianzo terá lugar o sábado 1 de marzo e a de Baíñas o día 8
As inscricións poden realizarse ata o 27 de febreiro de maneira online na Sede Electrónica ou presencial no Rexistro do Concello
Vimianzo celebrará neste 2025 un Entroido ‘terrorificamente divertido’ no que repartirá máis de 2.800 euros en premios. O sábado 1 de marzo a gran festa terá lugar en Vimianzo, mentres que o día 8 será a quenda de Baíñas. Ambos os dous días estarán marcados pola música, a diversión e, por suposto, os tradicionais concursos de disfraces.
En Vimianzo a xornada comezará ás 16:30 horas cun pasarrúas e animación con Rapacollon’s Big Band. Ás 18:00 horas dará comezo o gran concurso de disfraces. Mentres o xurado, composto por representantes de medios de comunicación da Costa da Morte, delibera os resultados o público poderá gozar da actuación musical de Oviravai e o seu espectáculo ‘Paio e o poder da música’. Ás 21:00 horas terá lugar a entrega de premios a cargo da alcaldesa, Mónica Rodríguez, e dos concelleiros e concelleiras.
As persoas interesadas poderán inscribirse ata o vindeiro 27 de febreiro descargando o formulario da web municipal. Esta información deberá ser presentada de maneira online na Sede Electrónica ou presencial no Rexistro do Concello.
Diferentes categorías
Os e as participantes poderán inscribirse nunha das diferentes categorías establecidas, que son:
- Comparsas: agrupacións de mínimo 20 persoas cunha temática unificada, que desfilen ou realicen algunha actuación.
- Grupos: formacións de entre 3 e 19 integrantes con temática unificada, que desfilen ou realicen algunha actuación.
- Parellas: disfraces conxuntos de dúas persoas con unidade temática.
- Individuais infantís: para menores de 16 anos que concursen de maneira individual. A inscrición debe presentala unha persoa adulta.
- Individuais adultos: participación individual de maiores de 16 anos.
Máis de 2.800 € en premios
Para ambos os dous concursos establécense premios que ascenden a 2.870 euros distribuídos da seguinte maneira:
- Comparsas: 1.000 € (1º premio), 500 € (2º premio), 200 € (3º premio).
- Grupos: 300 € (1º premio), 200 € (2º premio), 100 € (3º premio).
- Parellas: 100 € (1º premio), 75 € (2º premio), 50 € (3º premio).
- Infantís individuais: 60 € (1º premio), 40 € (2º premio), 20 € (3º premio).
- Adultos individuais: 100 € (1º premio), 75 € (2º premio), 50 € (3º premio).
NOTA DE PRENSA DO CONCELLO DE VIMIANZO
