Novo ataque dos lobos a mesma explotación de San Xoán de Grixoa en Santa Comba. En dous meses, tres vacas mortas e agora unha ovella.
Desde Radio Xallas, o gandeiro José Antonio Fariña expresaba a súa “frustración” mentres contemplaba o esqueleto da ovella: “Hoxe volveu a comer o que quedaba”.
«Aquí ninguén toma medidas»
Unha situación complexa: “Vives co medo no corpo, non lle ves sentido o que pasa xa que parece que estou traballando para manter a fauna salvaxe”.
“Aquí ninguén toma medidas nin tratan de buscar unha solución, temos que buscala os gandeiros”.Fariña ten avistado varios lobos en distintas ocasións e de diferentes características. “Penso que hai motos, e non deben ter comida suficiente no monte e van onde hai e andan cerca das casas”.
En datas diferentes observou exemplares de distintos tamaños pero un deles moi grande: “Era como un mastín pero non estaba gordo, pero o bicho daba respecto”.
«Haberá que sacrificar algún lobo ou levalos para outra zona»
Perden os animais e a súa produción. Critica o sistema de axudas aínda que explica que esa non é a solución:
“O que quero é que busquen solucións. Ou deixar de traballar, porque o mellor o que queren conseguir é que abandonemos as explotacións”.
O gandeiro xalleiro opina que algo hai que facer: “Haberá que sacrificar algúns lobos ou levalos para algunha zona onde haxa menos”.