O Concello de Santa Comba anuncia “o establecemento de quendas que respecten a xornada laboral” no Servizo de Axuda no Fogar.
Informan que trasladaron unha proposta “para a retribución das horas extra, o tempo dos recoñecementos médicos, horario de verán, fins de semana e festivos” que implicaría “un gran esforzo económico para o municipio”.
Aseguran que a “firme vontade de acadar acordos” do goberno local que permitan manter “a calidade e funcionalidade do servizo” chocou coa “constante confrontación e a negativa a chegar a pactos” nas reunións mantidas “tanto en xuntanzas informais coma en mesas de negociación coas diferentes centrais sindicais”.
Con esta situación o concello “vese forzado a tomar medidas para intentar mellorar unha situación xa enquistada respecto do Servicio de Axuda de Fogar”.O SAF de Santa Comba conta con preto dun cento de usuarios.
Financiamento do servizo
A través dun comunicado de prensa, desde o goberno local xalleiro lembran que solicitaron unha reunión coa Xunta de Galicia para “ abordar as problemáticas, así como para que revise a súas achegas e financiamento”.
A concelleira de Servizos Sociais, Estefanía Calvelo, tamén fai fincapé na necesidade de que dende as institucións autonómicas e estatais se cumpra o previsto na Lei de Dependencia para que o 100% do custo do SAF sexa asumido pola Xunta e polo Ministerio tal e como defende a FEGAMP, “xa que é inviable que os concellos sigan asumindo competencias impropias que afogan economicamente e hipotecan as administracións locais incrementando o capítulo de persoal por enriba do 50% nos orzamentos”.
