Información de AXEGA 112
Falece o condutor dun vehículo que envorcou nun terraplén en Cerceda
Os servizos sanitarios só puideron confirmar o falecemento do único implicado, que foi excarcerado polos Bombeiros de Ordes. As forzas da orde tratan de recabar toda a información posible para precisar a hora exacta do sinistro.
Un particular informaba ao 112 Galicia, pasadas as 10:15 horas, dun vehículo envorcado nun terraplén situado na marxe da AC-400 ao seu paso polo lugar da Silva, na parroquia de San Martiño de Rodís (Cerceda). Rapidamente, desde o 112 solicitouse a colaboración de Urxencias Sanitarias de Galicia-061, dos Bombeiros de Ordes, da Garda Civil de Tráfico e da Policía Local e Protección Civil de Cerceda.
Foron os Bombeiros os encargados de excarcerar ao condutor, atrapado no turismo do que era o único ocupante. Pola súa banda, o persoal dos servizos sanitarios nada puido facer pola súa vida.
Dúas persoas resultaron feridas tras chocar co seu vehículo contra un poste de formigón en Muros
O persoal de Urxencias Sanitarias de Galicia-061 encargouse de trasladar aos feridos ao centro hospitalario de referencia.
Un particular testemuña do accidente chamaba ao 112 Galicia ás 7:45 horas desta mañá, e indicaba que un vehículo acababa de colidir contra un poste de formigón situado no quilómetro 47 da AC-550. Ademais, engadía que os dous ocupantes atopábanse accesibles.
Desde o 112 deuse aviso aos servizos sanitarios, ao GES de Muros, á Garda Civil de Tráfico, así como a Protección Civil de Muros e aos servizos de mantemento das estradas.
Finalmente, o persoal sanitario encargouse de trasladar a ambos implicados ao centro hospitalario en ambulancia.
Colisión contra unha árbore en Coristanco
Estoutro accidente produciuse na parroquia de San Lourenzo de Agualada (Coristanco), e unha persoa tivo que ser trasladada polos servizos sanitarios. Por outra banda, ás 8:30 horas o obstáculo quedaba retirado polos servizos de emerxencias.
O 112 Galicia recibiu, pasadas as 6:15 horas da mañá, a chamada do condutor implicado, que explicaba que colidiu cunha árbore que cortaba por completo a estrada AC-552, á altura do quilómetro 43, e se queixaba de dor no pescozo.
No operativo, ademais de Urxencias Sanitarias de Galicia-061, participaron a Garda Civil de Tráfico, Protección Civil de Coristanco e os servizos de mantemento das estradas.
FOTO-TVG
