Foto- arquivo
Información-AXEGA 112
As constantes borrascas rexistradas na comunidade galega nos últimos días son a causa pola cal a Xunta mantén activo o Plan Especial de Risco por Inundación ante a suba do caudal nalgúns ríos.
Actualmente, os leitos que están baixo vixilancia son os Landro, en Viveiro; Mera, en Ortigueira; do Ouro, ao seu paso por Foz; Xubia, na localidade de San Sadurniño; Mendo, en Betanzos; Mero_A Telva, en Cambre; Xallas, Santa Comba; Tambre, ao paso por Oroso; Dubra_Tambre, en Val do Dubra; Furelos, no Santiso e Miñor, á altura de Gondomar.
Segundo a información recibida a través dos sistemas de control e seguimento, ao superar os limiares establecidos, estes cursos están a presentar un crecemento significativo dos caudais, polo que poden producirse enchentes puntuais.
Así mesmo, o Centro Integrado de Atención ás Emerxencias (CIAE) 112 Galicia foi informado da situación doutros cursos fluviais, como a do río Maior en Bergondo, a do Sar en Rois, en Fene a do río Cádavo e a do río Valga no seu concello homónimo.
Con todo, para controlar os leitos máis afectados polas crecidas, diversas agrupacións de Protección Civil puxeron en marcha distintos operativos para comprobar a situación e revisar as zonas máis afectadas.
Unha vez máis, volvemos a recordar á poboación a necesidade de incrementar a precaución, principalmente nas estradas e vías secundarias próximas de pontes ou torrentes pois a suba repentina do caudal pode provocar dificultades na circulación.
