O deputado nacionalista Néstor Rego afirma que o goberno deberá “corrixir o trato discriminatorio con Galiza”, porque pola contra PSOE e Podemos “cometerían un erro moi grave e terán que dar explicacións”.
As contas actuais non convencen a Rego:“É un orzamento expansivo que aumenta en moitos aspectos pero que no caso de Galiza baixa un 11% con respecto aos de Montoro que xa eran malos”.
Para o deputado estamos diante dunha “Discriminación inaceptable” que se debe subsanar aceptando as emendas que propón o BNG e que son “unha radiografía das necesidades de Galiza”. Pensan que como mínimo hai que destinar a nosa terra uns 1.000 millóns de euros.
Entrevista a Néstor Rego- desde o minuto 30
En declaracións ao programa “Na Encrucillada” de Radio Xallas, Néstor Rego puxo en evidencia a postura do secretario xeral do PSdeG, Gonzalo Caballero que en relación ós orzamentos anteriores afirmaba que eran “unha labazada do PP a todos os galegos e agora con 104 millóns menos parécenlle estupendos”. Lamentou esa actitude de estar “ao que lle mandan desde a dirección de Madrid”.
Con respecto as emendas do BNG referiuse a modernización das liñas ferroviarias ou a rexeneración das rías, como é o caso da ría de Corcubión na que se demanda un investimento duns tres millóns de euros para a limpeza dos fondos mariños. Por poñer dous exemplos.
Fixo tamén referencia aos acordos acadados co goberno e advertiu que “Os acordos hai que cumprilos, e non hai un acordo co BNG. É un compromiso con todos os galegos e galegas”.