A candidata do BNG, Ana Pontón, pediu unha mobilización masiva para poder conseguir o obxectivo, derrotar a Núñez Feijóo e que por primeira vez a Xunta teña «unha muller e unha nacionalista presidenta».
“Comeza unha campaña na que nos marcamos un obxectivo tan ambicioso como ilusionante: facer historia é que por primeira vez Galiza teña unha muller nacionalista como presidenta”, proclamou, “facer historia é conseguir o cambio que prenda o motor deste país e venza á parálise e a submisión que representa o PP; facer historia é construír unha nova Galiza, gobernada desde nós, viva, dinámica, con futuro, que se faga valer, que non baixe a cabeza diante de Madrid e que aposte con decisión por abrir un país novo” dixo Pontón.
A candidata do BNG insistiu en contaxiar ese optimismo aos presentes e a tódalas persoas que poden recibir a súa mensaxe: “Quero dicirvos, coa man no corazón, que o cambio galego é posible se todos e todas nos mobilizamos, co BNG podemos construír unha Galiza mellor, orgullosa, un país no que vivir e traballar, con xustiza e benestar social. O 12 de xullo, fagamos historia cunha muller presidenta, cun goberno capaz de darlle un futuro de esperanza a xente deste país. Ese é o meu compromiso!”.
Deixou claro que “un goberno liderado polo BNG vai demostrar que hai solucións para ALCOA, claro que é posible salvar o emprego e a produción dun sector estratéxico para Galiza. Como teñen a cara de dicirnos que non hai solución os mesmos que puxeron sobre a mesa 90.000 M€ para rescatar a banca, os mesmos que puxeron sobre a mesa 5.000 M€ para rescatar as radiais madrileñas! Por que ALCOA non, porque A Mariña non? Imos demostrar que hai solución cando teñamos un goberno que se faga valer, será posible a partir do 12 de xullo”.
E continuou nesa liña:»un goberno liderado polo BNG vai demostrar que é posible acabar co espolio enerxético, que é posible poñer fin a estafa das peaxes, que é posible poñer o país a producir, que é posible aproveitar os nosos recursos para xerar riqueza e emprego, vai demostrar que é posible traer a mocidade emigrada, que é posible ter servizos públicos fortes e libres de recortes, que é posible mellora a vida das persoas».
