A concelleira do BNG de Porto do Son e deputada das áreas de Benestar Social e Igualdade da Deputación durante os últimos catro anos, Ánxela Franco Pouso, falecía no mediodía deste domingo 2 de xuño no Hospital Clínico de Santiago, dunha enfermidade diagnosticada fai unhas semanas.A noticia causou unha fonda consternación.
O concello de Porto do Son celebrou pleno extraordinario no que se decretaron tres días de loito. O velatorio desenvólvese no Tanatorio”Los Dolores” de Xarás en Ribeira. Este luns ás 20h os seus restos trasladaranse ata a igrexa de Santa María de Caamaño, onde se celebrará o funeral e o enterro.
Condolencias da Deputación e do concello de Porto do Son
O pasamento de Ánxela Franco provocou sentidas reaccións. Desde o concello de Porto do Son séntense “totalmente abatidos trala noticia do falecemento da nosa compañeira, Ánxela Franco; unha muller forte e valente que, como concelleira e veciña, sempre tratou de acadar o mellor para Porto do Son. Dende o Concello de Porto do Son queremos enviar toda a nosa forza e cariño á súa familia, amigos e aos membros do Bloque Nacionalista Galego, especialmente aos seus compañeiros do BNG de Porto do Son.O noso máis sincero pésame. Descanse en paz”.
Tamén lamentaron o triste suceso, nun comunicado, o presidente e a vicepresidenta da Deputación da Coruña, Valentín González Formoso e Goretti Sanmartín Rei. Lembraron que “Ánxela Franco estaba convencida de que as institucións tiñan que apoiar ás persoas máis desfavorecidas e iso foi o que defendeu con enerxía desde o goberno da Deputación da Coruña”.
Ana Pontón:»Foise unha boa e xenerosa»
A portavoz nacional do BNG, Ana Pontón, tamén lle dedicou unhas agarimosas palabras a falecida: Foise unha boa e xenerosa: Ánxela Franco. Unha muller valente, decidida e que demostrou sempre o seu compromiso con Galiza. É un día triste para todas as que tivemos a sorte de coñecela, a familia nacionalista está de luto. Envío abrazo e forza á súa familia e amizades”.
