A Confederación Intersindical Galega(CIG) denuncia falta de transparencia na aplicación das listaxes de substitucións da Consellaría de Educación.
Listaxes sen actualizar, dúbidas na CIG
Segundo o sindicato nacionalista durante esta semana na aplicación do profesorado interino e substituto do Corpo de Mestres da Consellaría de Cultura, Educación e Ordenación Universitaria (https://www.edu.xunta.es/substitutoslistas/) a”parecen prazas de substitucións que pouco despois desaparecen sen ser adxudicadas publicamente”.
Nun comunicado de prensa desde a CIG explican que a situación agrávase “polo feito de que ao comezo de curso moito profesorado está pendente do seu nomeamento e ao ver que as prazas que lle poderían interesar aparecen e desaparecen diante dos seus ollos sen ser adxudicadas fai que se dubide moito da limpeza dun proceso, que debe ser pulcro e transparente”.
Incerteza nos interinos
Xunto coa denuncia por esta suposta falta de transparencia, o sindicato queixase de que as listas aínda non foron actualizadas despois do proceso selectivo realizado o curso pasado, “o que crea incerteza por parte do persoal substituto e interino”.
Desde CIG-Ensino esixen a actualización das listaxes de substitucións e que “estas prácticas sexan corrixidas e que toda praza que apareza no listado teña xustificación pública para a súa desaparición”.
