Cristóbal Mourín//Un feixe de actos por separado para celebrar o Día Nacional de Galicia este martes 25 de xullo.
O alcalde de Lalín e dirixente de Compromiso por Galicia, Rafael Cuíña, non ocultaba o seu malestar pola división existente á hora de celebrar o Día da Patria Galega:”Se non o digo rebento… creo que é impresentable que En Marea, BNG, CxG e algún máis non celebren conxuntamente o día da Patria”. Para Cuíña esta circunstancia é boa para o Partido Popular.
Precisamente o Partido Popular xa celebrou a xornada cun acto anticipado ao pasado venres, cunha ofrenda floral ante a estatua de Manuel Fraga en Vilalba, coa asistencia, ente outros de Miguel Tellado, Pedro Puy ou Elena Candia.O Partido Socialista volverá a Rianxo para celebrar, a partir das 12,00, a tradicional ofrenda floral ante o busto de Castelao, coa presenza da vicesecretaria xeral do PSOE, Adriana Lastra.
O BNG agarda un día con moita mobilización social
O BNG agarda que esta Día da Patria sexa o máis multitudinario dos últimos anos. Os nacionalistas farán o habitual percorrido nunha manifestación desde a Alameda ata a Praza da Quintana onde terá lugar o acto político no que intervirá, entre outras persoas, a voceira nacional, Ana Pontón.
Segundo o secretario de comunicación, Xavier Campos, o BNG pretende converter a xornada “nunha gran mobilización social en contra da discriminación que soporta Galiza por parte do Estado e para reclamar un cambio de rumbo para construír un país con oportunidades, que garanta que ninguén se vai quedar atrás por moito que a vida se lle torza, a Galiza das oportunidades, do emprego e dos dereitos”.
Estarán representados distintos colectivos políticos do estado coma ERC, CUP, Eusko Alkartasuna, PNV, EH-Bildu, Més per Mallorca ou do Bloco de Esquerdas e do Partido Comunista de Portugal.
Tamén asistirán traballadores de Ferroatlántica, e representantes da asociación Long Hope, Asociación Monte Pindo, ou de Solidariedade Galega co Pobo Saharauí. Xa en días previos tanto o Bloque como Galiza Nova celebraron distintos actos conmemorativos.
División da esquerda rupturista
Anova Irmandade Nacionalista optará polo Parque de Galeras para celebrar o seu acto político e a súa romaría popular, a partir das 13,00h, despois dunha véspera de debate.
Os actos de En Marea comezarán as 12,30 na finca Vista Alegre “cunha dinámica participativa” consistente “en pendurar dunha árbore frases e ideas sobre o país que imaxinamos”. Intervirán representantes de distintos movementos sociais e haberá distintas actividades.
Compromiso por Galicia
Compromiso por Galicia desenvolverá o seu acto central no parque Eugenio Granell(13,30h), con convidados do PNV e do Partido Socialista portugués e con distintas intervencións entre elas a do secretario xeral Juan Carlos Piñeiro Docampo, dos alcaldes de Muros e Lalín, do presidente do partido Xoán Bascuas e dos representantes dos partidos convidados.Antes haberá unha ofrenda floral no Panteón dos Galegos Ilustres.
Todos os actos terán como epicentro Santiago de Compostela, a excepción do de Esquerda Unida que elixe a localidade de Mugardos para celebrar na praza do concello(12,00) un acto político e xantar a Juan Prieto Balsa, alcalde comunista da localidade en 1936.