O BNG solicita no Parlamento a creación dunha comisión de investigación sobre todas as adxudicacións públicas ao grupo de Villar Mir.
Os deputados do Bloque no Parlamento de Galicia materializaron o que xa anunciara a voceira Ana Pontón este mércores. En forma de proposición non de lei os nacionalistas solicitan a creación dunha comisión de investigación que investigue as autorizacións, contratos, concesións e adxudicacións das empresas do grupo Villar Mir co sector público galego. E que se poña o foco no “intento de venda e segregación ilegal das centrais dos ríos Xallas e Grande”.
Aínda que a proposta vaise a debater o BNG anuncia o inicio de contactos para obter o apoio das demais forzas políticas que a mesma prospere.“É imprescindible crear esa comisión en aras da transparencia, acceso á información pública e ao bo goberno, máxime cando está en xogo o emprego industrial en toda a Comarca da Costa da Morte e o interese xeral de Galiza” indican desde o Bloque.
Con respecto a situación de Ferroatlántica na Costa da Morte, Ana Pontón escribía nas redes sociais: ”Feijóo ten que decidir, se vai aceptar a chantaxe do empresario imputado pola financiación ilegal do PP ou se vai defender o emprego na Costa da Morte, o interese xeral de Galiza e evitar que se faga unha venda que é ilegal, e que é un atropelo a dignidade do noso pobo!Galiza non está para pagar as mordidas, nin os favores que o PP lle debe a Villar Mir”.
Sobre o Grupo Villar Mir, desde o BNG, lémbrase que Villar Mir foi doante da Fundación Manuel Fraga, e recibiu “a adxudicación a dedo” de 1,3 millóns de euros para a xestión dos albergues do Camiño de Santiago a través da construtora OHL, así como outras adxudicacións como a nova liña de atraque no porto vigués de Bouzas por 4,1 millóns de euros ou o contrato para mellorar o calado do Porto de Punta Langosteira por importe de 785.000 euros
