En Marea e PSOE pensan que o traslado foi “irresponsable” e o Comité de empresa confirma erros na plataforma tecnolóxica.
O vicepresidente da Xunta de Galicia, Alfonso Rueda, asegurou que o traslado do 112 a localidade da Estrada levouse a cabo “sen incidencias” e que estivo avalado polos técnicos da Xunta nunha decisión tomada despois “de analizar parámetros obxectivos”
Rueda Valenzuela lamentou que a oposición tentaba “sacar réditos” coas súas críticas e “xa falaban dos problemas antes de que sucedera o traslado”. Para o goberno, con esta medida “a atención ás emerxencias mellora moito coas novas tecnoloxías e cunha plataforma que permite unha atención integrada e integral”.
Alfonso Rueda sinalou que despois do traslado a atención “estase desenvolvendo con profesionalidade” e o servizo “está funcionando ben” aínda que en evolución. Agradeceu o esforzo dos traballadores do 112 e lembrou que o goberno bipartito plantexa o traslado do servizo ao concello de Oroso.
Eva Solla e Juan Díaz Villoslada
A deputada de En Marea,Eva Solla,cualificou de “irresponsable” o traslado e denunciou que os traballadores non recibiron a formación necesaria para usar unha nova plataforma tecnolóxica que non funciona correctamente.
“O sistema operativo non funciona. Hoxe estivo parado media hora, e os traballadoresestán chamando ós bombeiros cos seus teléfonos móbiles particulares” afirmou Solla. A deputada tamén se fixo eco da perda de ingresos dos traballadores que aumentan os seus desprazamentos.
Pola súa banda, o deputado socialista Juan Díaz Villoslada tamén criticou que se realizara o traslado “cunha folga convocada”, e emprazou ao goberno galego a chegar a un acordo cos traballadores.Tamén recolleu queixas que existen polo funcionamento da plataforma.
Despois da dúas preguntas parlamentarias de En Marea e PSOE, representantes do comité de empresa do 112, lanzaron as súas críticas contra a intervención do conselleiro de Presidencia.
