O Instituto Terra do Xallas celebra desde o vindeiro luns e ata o 7 de abril a súa II Semana Cultural.
Intensa semana e atractivas actividades no instituto de Santa Comba que se converte un ano máis nun foco de efervescencia cultural e científica, coa súa II Semana Cultural, que conta co apoio do concello xalleiro.
Ángel Carracedo, De Vacas e xornadas do Xapón
O luns haberá unha charla do Catedrático de Medicina Legal e experto xenetista xalleiro Ángel Carracedo, que recentemente participou nun foro organizado por Ler Librerías en Santa Comba.
O martes está prevista a actuación do grupo musical De Vacas. Xa o mércores a compañía Fantoches Baj representará a obra de Castelao “Os vellos non deben de namorarse”.
O xoves 6 de abril, haberá unha xornada intercultural. Se o ano pasado estivo adicada a Cabo Verde nesta ocasión o país elixido é Xapón. Haberá un obradoiro de origami, outro de caligrafía shodÅ con Megumi Shiozawa e un concerto de frauta shakuhachi a cargo de Rodrigo Rodríguez.
O venres o Instituto Terra do Xallas recibirá a visita de Idoia Cuesta, Premio Nacional de Artesanía 2014 e colaboradora da firma Loewe, que impartirá un obradoiro de cestería contemporánea.
E moitas cousas máis
Pero estas non serán as únicas actividades xa que ao longo de toda a semana organizaranse obradoiros de animación a lectura,instrumentos musicais, rap, tecnoloxía, e primeiros auxilios. Tamén haberá visitas literarias a Pobra e Rianxo e unha excursión á sede do Museo Nacional da Ciencia e Tecnoloxía da Coruña.
O programa complétase cunha charla da profesora da Universidade de Santiago de Compostela, María Belén Méndez Naya, a posta en marcha dun mercadiño benéfico e unhas xornadas de ping pong e ioga.
