A voceira nacional fai un chamamento a todas as persoas que senten Galicia para que se sumen ao BNG.
Ana Pontón reforza o seu papel no temón nacionalista
«En bloque cara un tempo novo». De novo na Coruña, trintaecinco anos despois da asemblea de Riazor, a formación nacionalista celebrou o seu conclave, con optimismo en un ambiente acougado e festivo.
Ana Pontón Mondelo foi apoiada polo 98,2% da militancia nunha asemblea na que se cumpriron as expectativas e que serviu para reforzar o papel da súa voceira nacional, que mantén a súa estrutura directiva con algunhas incorporacións.
”Aquí está o BNG, en pé, forte, unido” manifestou Pontón, que recoñeceu que a nave do BNG sufriu temporais e adversidades pero que aprendeu “dos seus erros” e hoxe continúa a súa singradura:” Nin retirado nin desguazado, con iniciativa e impulso está hoxe o BNG”.
O BNG como ferramenta de progreso
Un proxecto necesario para Galicia porque segundo a política de Sarria “o nacionalismo é un movemento popular que cuestiona un mundo cada vez máis inxusto”. Ademais de ser “a ferramenta que ten Galicia para existir politicamente e progresar como pobo”.
Nunha asemblea sen controversias nin liortas pero consciente de que o BNG ten que medrar, Ana Pontón lanzou unha mensaxe a unha parte importante da sociedade galega:”Todas as persoas que cren neste país,que traballan e loitan para erguelo, todas, absolutamente todas, teñen cabida no BNG”.
Nova executiva
A nova executiva nacional estará composta por Ana Pontón,Eva Vilaverde, Xavier Campos, Olalla Rodil, Noa Presas, Olaia Ledo, Xosé Manuel Marcote, Xosé Emilio Vicente ,Rubén Cela, Xosé Luís Rivas “Mini”, Goretti Sanmartin, Carme da Silva, Néstor Rego, Ana Miranda, Obdulia Diniz, Bieito Lobeira, Montse Prado, Luís Bará e Susana Camba.O Consello Nacional complétase con 31 persoas máis.
“Queremos ser o efecto bolboreta que remude o panorama e constrúa un futuro mellor para a nosa xente” sinalou Pontón.
