A oposición de Noia pide a dimisión de Santiago Freire.Adiante Galicia conversou co voceiro da Marea Cidadá de Noia, Manolo Seijas.
As desculpas do alcalde de Noia pola súas desafortunadas declaracións non convencen a oposición que este venres pedirá a dimisión do alcalde, nunha rolda de prensa que se celebrará a partir das 12 do mediodía.
En declaracións a Adiante Galicia, o voceiro da Marea Cidadá de Noia confirmou que os tres grupos piden a dimisión de Santiago Freira porque “entendemos que faltou ao respecto a cidadanía en xeral e ás mulleres en particular”.
“Cando ofendes a alguén tes que dar un paso atrás e irte”
Manolo Seijas pensa que “Noia non pode ser coñecida por ter un alcalde machista”. Con respecto ás escusas ofrecidas por Freire Abeijón o voceiro da Marea manifesta que “cando ofendes a alguén tes que dar un paso atrás e irte”.
Ademais matiza que as súas declaracións fixéronse “como alcalde dun pobo” e non oculta a súa estrañeza de que se difundira un comunicado coordinado desde a dirección provincial do PP. Sobre o contido das declaracións, Seijas asegura que “non me sorprende nada do Partido Popular”.
Desde as Xuventudes Socialistas tamén piden a renuncia de Santiago Freire. A portavoz parlamentaria do BNG, Olalla Rodil, dirixiuse ao presidente da Xunta, Alberto Núñez Feijóo para preguntarlle “se o seu feminismo sen etiquetas do que presume é compatible cos chistes pexorativos sobre as mulleres proferidos polo rexedor noiés nada menos que durante un acto oficial de celebración do 8 de Marzo”.O deputado de En Marea na cámara estatal, Antón Gómez Reino, tamén criticou estas afirmacións.
A secretaria xeral de Igualdade, Susana López Abella, expresou o seu “rotundo rexeitamento” polas declaracións “desafortunadas” de Freire Abeijón, ainda que valorou que o rexedor “foi consecuente co seu erro e pediu desculpas”.
@AdianteGalicia