“A Marea Atlántica está demasiado centrada en vetar” dixo o portavoz do PSdeG, Xoaquín Fernández Leiceaga, ante a situación xerada na cidade da Coruña.
Respaldou a actuación “sensata e razoable” do grupo municipal socialista que “fixo os deberes en función dos intereses cidadáns para desbloquear as contas”, con varias propostas que “deberían ser valoradas polo goberno municipal”.
“Chama a atención que os novos actores sexan os que teñan dificultades para entender as reglas do xogo e que impulsen unha política de vetos de vez dunha política de acordos” declarou Fernández Leiceaga.
“O PsdeG fixo os deberes”
O líder socialista recriminou ao goberno de Xulio Ferreiro que antepoña “as limitacións partidarias” e lamentou que a Marea Atlántica estea “demasiado centrada en vetar”, poñendo como exemplos ao voceiro de En Marea, Luís Villares, ou esta situación, referida supostamente a Mar Barcón, aínda que non a citou.
Para Leiceaga estamos ante “unha oportunidade perdida” e pediu “un esforzo para entenderse” xa que entende que un acordo sería posible entre as dúas forzas.
Terreos da Solana
Na mesma comparecencia, o portavoz parlamentario do PSdeG, Xoaquín Fernández Leiceaga, e o deputado coruñés Juan Manuel Díaz Villoslada reclamaron esta mañá na Coruña unha “solución definitiva” para que os terreos da Solana sexan públicos e solicitaron que se abra a posibilidade legal da cesión gratuíta, “como xa se fixo noutras infraestruturas portuarias de España”, explicaron, xa que é un espazo “integrado perfectamente na cidade”.
Fernández Leiceaga mostrouse estupefacto polo feito mesmo de que a privatización destes terreos se poña enriba da mesa. “É un asunto que nunca debía ter chegado a este extremo. Como cidadán resúltame chocante que se poida falar dunha privatización dese espazo”, dixo, e máis aínda “que a alguén se lle poida ocorrer isto e que desde un ámbito de responsabilidade pública no que está presente a Xunta se vexa como algo normal ou algo que se pode facer”.