Manolo Vello:“Este será o conclave máis importante de Compromiso por Galicia desde a súa constitución”.
Baixo o lema “Renovando o galeguismo. Nova organización. Novas accións”, Compromiso por Galicia celebra o vindeiro sábado 21 de xaneiro no Hotel Congreso de Teo, o seu II Congreso Nacional.
Relanzamento de Compromiso por Galicia
Na presentación do Congreso, o secretario nacional de organización, Manoel Vello, manifestou que “este será o conclave máis importante de Compromiso desde a súa constitución”, destacando o feito de que vai supor o “relanzamento do partido” despois de catro anos de vida e da “reconfiguración do seu corpus militante”. Un tempo no que houbo altas e baixas de afiliados por distintos motivos.
Pero a formación galeguista segue acreditando no seu proxecto.Vello Salvado pensa que é necesario renovar “a idea de que levamos moitos anos sen un galeguismo organizado” e que hoxe en día Compromiso por Galicia, con dúas alcaldías significativas como son Lalín e Muros, e cuns trinta concelleiros, representa «o galeguismo máis organizado e o de maior implantación do país».
41 candidatos e unha delegación do PNV
Manoel Vello salientou que entre os 41 candidatos e candidatas ao Consello Político Nacional hai moitas caras novas que certifican esta nova singradura política.Os congresistas votarán tamén unha nova cara para a secretaría xeral do partido, á que só presentou candidatura o lucense Juan Carlos Piñeiro.
O polo de agora secretario xeral do partido, Xoán Bascuas, xa anunciou fai uns meses a súa intención de non repetir no posto, aínda que continuará participando neste proxecto político.
Desde Compromiso tamén destacan as emendas que se debaterán nesta cita e que “marcarán o futuro do partido” e que foron presentadas pola militancia ós documentos de Política, Estratexia e Estatutos.Neste segundo Congreso Nacional estará presente unha delegación do Euzkadi Buru Batzar(EBB), a executiva do Partido Nacionalista Vasco.
