O deputado José Manuel Pequeño anuncia que os datos das estradas integraranse nunha APP, que permitirá programar actuacións de mantemento e mellora.
A Deputación da Coruña levará a cabo durante 2017 unha campaña para medir a intensidade de tráfico que rexistran os 2.103 quilómetros da rede provincial de estradas nos 93 concellos coruñeses.
O goberno provincial vén de sacar a licitación este servizo, para o que serán necesarias un mínimo de 18 estacións móbiles que realizarán durante este ano un total de 800 aforos dunha semana de duración, e que suporá investimento de 179.685 euros.
Ademais do reconto do número de vehículos que transitan a diario por cada un dos tramos analizados, o aforamento das estradas permitirá coñecer a distribución horaria do tráfico, o sentido da circulación, os tipos de vehículos que circulan por cada estrada e as súas velocidades medias.
Segundo explicou o deputado responsable da área de Vías e Obras da Deputación da Coruña, José Manuel Pequeño Castro, todos estes datos volcaranse despois nunha aplicación informática que «permitirá facer unha completa radiografía do tipo e volume de tráfico que soporta cada unha das estradas provinciais» e que servirán «para programar mellor as accións de conservación e mantemento, os novos investimentos, detectar os puntos negros da rede vairia e incluso definir o grosor do pavemento, en función do tráfico pesado que circule pola estrada».
Un «Street View» para as estradas provinciais
Esta campaña de medición e análise do tráfico enmárcase dentro dunha serie de medidas que implementará durante 2017 o departamento de Vías e Obras da Deputación para mellorar e actualizar os sistemas de control e xestión das estradas, entre as que se inclúe a contratación dunha nova aplicación informática que permitirá a visualización en 3D de calquera tramo das 413 viais provinciais.
O programa, actualmente en fase de licitación por importe de 292.820 euros, funcionará de xeito análogo ao Street View de Google, permitindo aos enxeñeiros comprobar o estado e situación de cada unha das estradas, a súa sinalización, as medicións exactas da plataforma e beiravías, as coordenadas GPS dun punto determinado e outros parámetros técnicos de interese, grazas a unha exhaustiva base de datos con imaxes en tres dimensións obtida a partir de medicións con sistema LIDAR (detección e medición por láser), que permite a creación dun levantamento topográfico con exactitude milimétrica da vía e das súas marxes.
Esta nova aplicación permitirá ademáis incorporar todos os datos do catálogo provincial, como a sinistralidade, o estado de conservación ou os datos de transito de vehículos que se obteñan na campaña de aforamento.
5 millóns para desbroces e reparacións urxentes
Para mellorar o estado das estradas, a Deputación da Coruña destinará ademáis un orzamento de 4 millóns de euros para o desbroce das marxes das estradas provinciais, o que permitirá mellorar a visibilidade da circulación, evitar a propagación de incendios durante o verán e facilitar o drenaxe en caso de choiva.
O departamento de Vías e Obras reforza tamén o servizo de reparación urxente de estradas, que conta en 2017 cun orzamento de 1 millón de euros, un 47% máis que o ano anterior, e que permitirán despexar en cuestión de horas as estradas afectadas por accidentes, neve ou temporais, así como o arranxo inmediato de fochancas e outras perturbacións da seguridade viaria.
