Compromiso por Galicia. O partido galeguista celebrou o seu congreso fundacional o 16 de decembro de 2012. Reivindícase como unha forza aberta e integradora para defender os intereses de Galicia.
Catro anos de Compromiso por Galicia
Hoxe fai catro anos que Compromiso por Galicia organizaba en Santiago de Compostela o seu congreso constituínte baixo o lema “Proxecto de país” coa asistencia de medio milleiro de persoas que elixían como secretario xeral a Xoán Bascuas.
Pasaron catro anos e Compromiso por Galicia está presente en distintos concellos de Galicia e ostenta as alcaldías de Lalín, Muros ou Vilar de Santos. E despois dunhas eleccións autonómicas preparan unha nova etapa, na que o profesor universitario Xoán Bascuas será substituído na dirección por outra persoa, seguindo a súa propia vontade. Será no II Congreso Nacional que terá lugar o sábado 21 de xaneiro.
Orlando Villamayor:”Agora é o momento de coller un novo impulso”
Nesta xornada de aniversario, o secretario nacional de comunicación de Compromiso, o estradense Orlando Villamayor, reivindicaba o papel que debería ter o partido “como forza que englobe a unha maioría dos galegos que queren ter un referente aberto e integrador que defenda os seus dereitos sen intermediarios”.
Villamayor Torres agradeceu o traballo de moitas persoas que “aportaron o seu grao de area para poñer os cimentos deste proxecto” nuns anos “de moito traballo e nun contexto político difícil”.
O secretario de comunicación galeguista defendeu a necesidade de profundizar no autogoberno de Galicia “diante dun novo tempo de reformulación do estado onde o noso país non pode perder o tren e ten moito que dicir”.
En Compromiso están convencidos de que queda moito por avanzar pero tamén saben que teñen nas vindeiras eleccións municipais unha proba e unha oportunidade:”Estamos nun punto de reinicio. Agora é o momento de coller un novo impulso e tinguir de verde os nosos concellos” declarou Orlando Villamayor.
