Paula Prado: “Pensan que toda a xente pensa o mesmo, e despois nas urnas levan os chascos que levan”.
A deputada do Partido Popular, Paula Prado, asegurou que para esta lexislatura “o obxectivo máis claro é o de xerar emprego” e baixar por debaixo do 10% da taxa de paro porque “a xente votou coa ilusión de que o noso proxecto se cumpra”.En declaracións ao programa “Galicia por Diante” da Radio Galega, expresou o seu convencemento de que “a xente votou ao PP porque non había alternativa e o estábamos facendo ben” e valorou tamén a reflexión iniciada no PP despois dos malos resultados das eleccións municipais que marcaron “un punto de inflexión” xa que “estábanse facendo moitas cousas que non se estaban explicando”.
“Percibía na rúa que íamos ter un apoio moi importante.A xente que quería un futuro mellor e estabilidade votou ao Partido Popular” asegurou Prado del Río que tamén valorou a boa aceptación que ten Alberto Núñez Feijóo:”Tíñamos un magnífico candidato e tiñamos que poñelo en valor”.
Paula Prado tamén tivo palabras para os grupos da oposición e os seus resultados:”Os da esquerda están acostumados a facer moito ruído e pensan que toda a xente pensa o mesmo, e despois nas urnas levan os chascos que levan”.Así mesmo dubida da cohesión de En Marea:”Non sei o que durará a Marea sendo o grupo maioritario da oposición”. Definiu a esta formación como “un grupo fragmentando desde antes das eleccións”.
Tampouco ocultou a súa decepción con Xosé Manuel Beiras:”Beiras practicamente non aparecía polo Parlamento” dixo.A deputada popular agarda que se resolva pronto a situación política a nivel estatal xa que considera que “a economía está moi parada debido a situación de inestabilidade política do país”.
