//Xoán Bascuas non optará a reelección pero insiste en que Compromiso por Galicia ten que “ocupar un espazo que está baldeiro na realidade”// A apelación ao voto útil e o grao de descoñecemento, causas dos malos resultados//
O secretario xeral de Compromiso por Galicia,Xoán Bascuas, anunciou o pasado sábado que non continuará no seu posto despois do congreso ordinario previsto para o mes de xaneiro.
Nunha entrevista no programa “Área Pública” que dirixe Susana López Carbia na Televisión de Galicia, Bascuas analizou os malos resultados electorais acadados por Compromiso situando a causa “máis poderosa” do retroceso na “apelación ao voto útil” xa que “a xente entendía que íamos ter moi complicado obter representación e preferiron optar por alternativas ou opcións que tiñan máis fácil entrar no Parlamento”.O político galeguista tamén lamentou a discutida ausencia no debate electoral da TVG:”se eu estivera no debate da TVG, a xente coñecería máis a Compromiso”.Tamén sinalou que “cunha maior presenza nos medios de comunicación probablemente outro galo cantaría”.
Xoán Bascuas incidiu ademais “no grao de descoñecemento”que hai da formación e aínda que pensa que “estamos nunha fase de construción”, entende que “o noso discurso político é de fácil acollemento por parte da cidadanía”. E o secretario xeral de Compromiso foi máis lonxe:“Somos aceptados como unha segunda opción electoral por moita xente pero non termina por materializarse como primeira”.
Preguntado polo posible papel do alcalde de Lalín; o secretario de CxG afirmou que o papel de Rafael Cuíña “é o que el quere ter e será o que el queira” e destacou o “papel referencial” que ten nun partido que debe aspirar a “ocupar un espazo que está baldeiro na realidade”.Xoán Bascuas aposta por seguir “forxando esta forza política” e “hai que ir gañando cada espazo centímetro a centímetro” porque “hai espazos que tardan en fraguarse”.
