O centro de saúde “Ángel María Carracedo” recibiu onte a visita dunha comitiva de representantes da Consellería de Sanidade da Xunta de Galicia, encabezados polo seu titular Jesús Vázquez Almuiña.
Tamén estiveron no centro médico o xerente do Sergas, Antonio Fernández Campa, o director xeral de asistencia sanitaria, Jorge Aboal e o xerente da EOXI, Luís Verde Remeseiro. Visitaron as instalacións e departiron coa alcaldesa de Santa Comba, María Pose, e co director do centro, Felipe Calle, para estudar a necesidade de mellorar servizos e material neste edificio.Na visita tamén estiveron presentes os concelleiros populares Esther Espasandín, José Pose e José García Suárez.
Campaña electoral tranquila
Por outra banda, no concello de Santa Comba a campaña electoral está transcorrendo de xeito tranquilo. Polo momento a única formación que organizou actos foi o Partido Popular. O domingo houbo un mitin no multiusos coa intervención das candidatas Beatriz Mato e Paula Prado, e da alcaldesa María Pose e o luns, día de feira, o candidato número un pola provincia da Coruña, Diego Calvo Pouso, participou nun reparto de publicidade electoral acompañado pola propia rexedora María Pose, e por concelleiros e membros do comité local.En precampaña tamén estivo de reparto o candidato de Compromiso por Galicia, Xoán Bascuas.