//O alcalde de Mazaricos pide unha senda entre A Picota e A Insua// A Deputación investiu máis dun millón de euros no concello// Este mes comezan as obras da senda peonil de Ponte Olveira//
O presidente da Deputación da Coruña,Valentín González Formoso, visitou o concello de Mazaricos, onde foi recibido polo alcalde, Juan José Blanco, co que mantivo unha xuntanza na que tamén estiveron presentes o deputado da área de Promoción Económica e Emprego, José Luís García, o concelleiro Esteban Pereiro e técnicos do organismo provincial.
Valentín González Formoso dou conta da elaboración dun anteproxecto para a ampliación da Ponte Olveira, que atravesa o río Xallas entre Mazaricos e Dumbría, e que está pendente dun informe da Xunta de Galicia.Desde a Deputación informaron que o anteproxecto “contempla o ensanchamento da estrada no tramo estreito da ponte, que actualmente comparten turismos, camións e os milleiros de peregrinos que cada ano atravesan a ponte na súa ruta xacobea, e a creación de andéns laterais para o paso de peóns, o que incrementaría notablemente a seguridade”.
González Formoso anuncioulle tamén ao alcalde de Mazaricos que este mes de setembro iniciaranse as obras de construción dunha nova senda peonil entre os puntos quilométricos 19,600 e 20,100 da estrada provincial DP-3404,Juan Blanco solicitoulle ao goberno provincial a construción dunha senda entre A Picota e o núcleo da Insua, unha proposta que González Formoso se comprometeu a estudar.
Desde a Deputación informaron que no últimos ano investíronse máis dun millón de euros para mellora das infraestruturas municipais e que permitiron entre outras cuestións a pavimentación das rúas Galicia e Ventín, a mellora de camiños en Eirón, Coiro, Alborés, Antes, Colúns e outras parroquias e a mellora das instalacións deportivas e socioculturais do municipio.