Xoán Bascuas lembra que Compromiso por Galicia non leva imputados nas súas candidaturas e asegura que se o PP realmente que limpar as súas estrutura “ten moito choio por diante”.
Mensaxe ao Partido Popular
Cando acabamos de coñecer que Xosé Luís Baltar declarará o vindeiro 8 e xuño en calidade de investigado nunha causa sobre presuntos delitos de suborno, tráfico de influencias e acoso sexual, que en principio afectaba só ó seu fillo e presidente do PP de Ourense, a formación Compromiso por Galicia pide valentía para loitar contra a corrupción e faise eco das declaracións do presidente do PP, Mariano Rajoy sobre as persoas que se foron apartando do partido conservador.
O secretario xeral de Compromiso por Galicia e candidato á presidencia da Xunta, Xoán Bascuas mostrou a súa satisfacción polas palabras de Rajoy “sobre a existencia de numerosos casos de corrupción no seu partido” pero considera que “chove sobre mollado” e polo momento as medidas adoptadas polos populares foron insuficientes e aínda lle queda “moito choio por diante” se queren limpar as súas estruturas.
Nin cargos orgánicos, nin candidatos imputados
“Mentres Mariano Rajoy fala de que apartou a moitos corruptos, en Galicia, os xulgados están saturados de causas que implican a dirixentes do Partido Popular e esa non é a clase dirixente que queremos para a nosa terra” manifestou Bascuas, que lembrou que Compromiso por Galicia non levará a ningunha persoa imputada nas súas listas nin tampouco ten membros investigados entre os seus cargos orgánicos.
O líder da formación galeguista pediu firmeza e coherencia aos partidos políticos para desterrar a corrupción da actividade política e desexa que “os titulares dos medios de comunicación non sexan as investigacións de Ourense e si a creación de emprego ou que Galicia destaque polas iniciativas sociais, algo que a día de hoxe semella unha utopía por culpa dos propios políticos”.
