Ana Pontón en Adiante Galicia:”Cando falamos do dereito a decidir estamos falando de cuestións do día a día”. Sobre as críticas internas a voceira nacional do BNG di que “cando a militancia decide hai que traballar pola unidade”.
Escoita ou descarga a entrevista con Ana Pontón
A portavoz nacional do BNG participou nas “Conversas na Encrucillada” e asegurou que un dos seus obxectivos é aportar “para dar unha alternativa de futuro a este país que está desolado” e que se produza “un cambio de 180 graos a partires das vindeiras eleccións”.
“Estamos nun proceso de conversas con persoas e organizacións”
Sobre os cambios efectuados desde a asemblea nacional, Pontón precisou que se mudou a diagnose:”Cando falamos do dereito a decidir estamos falando de cuestións do día a dia” como por exemplo “o espolio da enerxía eléctrica que é un recurso colectivo”.
Nesta conversa non precisou se estaría disposta a ser a candidata a presidencia da Xunta de Galicia e dixo que será a militancia a que toma esa decisión. O que si ten claro Pontón Mondelo é que “haberá unha candidatura nacionalista” que podería artellarse a carón doutras forzas:”Estamos nun proceso de conversas con persoas e organizacións, que será o que determine esa candidatura que rompa co centralismo”.
“Galiza está desaparecida de Madrid”
A portavoz do BNG pensa que xa pode haber xente que lamenta que o BNG non estea representando nas cortes españolas “porque Galiza está desaparecida en Madrid”.
Ana Pontón agradece que o presidente da Xunta de Galicia, Alberto Núñez Feijóo decidise “acabar coa farsa de carácter preelectoralista” sobre a decisión de presentarse e afirmou:”Alégrame de que Feijóo sexa o candidato porque nos vai a dar a ocasión de asinarlle a carta de despedimento nas vindeiras eleccións”.
Posición de país e traballo de unidade
Entre os reproches que lanzou a Feijóo está o sector naval e pesqueiro, o I+D+I ou do sector lácteo:”Enganou os produtores de leite dicindo que a solución viña dos acordos de Madrid”. Pensa neste asuntos fai falla unha posición de país”.
Con respecto a situación interna do BNG e as críticas e incluso abandonos sufridos, Ana Pontón dixo:”Cando a militancia debate e decide hai que traballar con unidade”.
