Desde este 7 de marzo está operativo o “Portal da transparencia e goberno aberto” da Xunta de Galicia.
A directora xeral de Avaliación e Reforma Administrativa, Natalia Prieto, presentou o ‘Portal de Transparencia e Goberno Aberto’, que se puxo a andar coincidindo coa entrada en vigor da Lei de Transparencia e Bo Goberno.Segundo Prieto estamos ante un “punto único, directo e centralizado” para que os cidadáns poidan acceder a información do goberno galego, distribuídos en catro bloques: transparencia, temas, solicitude de acceso á información pública e outras organización.
O enderezo deste portal é http://transparencia.xunta.gal aínda que tamén se pode acceder desde a web da Xunta de Galicia.
“Unha ferramenta viva e dinámica con vocación de mellora permanente”
Natalia Prieto asegurou que o ‘Portal de Transparencia e Goberno Aberto’ nace coa finalidade de ser “unha ferramenta viva e dinámica cunha vocación de mellora permanente” e de fomento da participación da cidadanía nos asuntos públicos e que, precisamente por iso, irase incorporando nel aquela información pública que solicite con maior frecuencia a cidadanía.
Segundo a Xunta desde agora “calquera persoa poderá atopar unha maior cantidade de información da que dispoñían ata o de agora -e máis da que establece a lexislación básica estatal- e solicitar electronicamente calquera tipo de información pública”.
Pretendeuse artellar un sistema de navegación sinxela e recoller nun mesmo espazo distinta documentación que estaba dispersa. Pódese acceder a información tanto en galego como en castelán.Tamén se inclúe neste portal o acceso ó Valedor do Pobo e ós seus servizos.