Breogán Riobóo fala para Adiante Galicia.Asegura en “Conversas Na Encrucillada” que non anunciou que se ía a presentar a secretaría xeral porque “agora non toca”. Afirma que o seu único propósito foi sempre velar polo cumprimento dos documentos aprobados pola militancia na asemblea de Vista Alegre e pide que se respecten as decisións dos territorios.
Breogán Riobóo síntese apoiado polas bases
O secretario xeral de Podemos asegurou que logo de participar en 18 asembleas en toda Galicia e falar con preto de mil simpatizantes de Podemos síntese apoiado polas bases porque “a xente agradeceu que saíra esa posibilidade e está desexosa de falar, a xente de Podemos quere debater cara a cara para decidir conxuntamente”.
Nunha nova entrevista do podcast de Adiante Galicia, Riobóo lembrou que iso foi precisamente o que suxeriu e que provocou unha tormenta política intensa:”Eu poñía sobre a mesa tres escenarios conxuntos que había e que segue habendo para falar e debater conxuntamente”.
A pesar de toda a polémica, o político naronés está convencido de que realizou “un acto de coherencia e responsabilidade” para “analizar un proceso electoral e o seu contexto de cara o futuro” e deixou claro que “non me decantei por ningunha das tres opcións”. Aínda así considera que a maioría das bases apoiarían unha confluencia como a de En Marea aínda que “no proceso de En Marea houbo cuestións que non estiveron garantidas”.
«Agora non toca. Terei que ser eu o que o diga se me presento»
O obxectivo de Breogán Riobóo neste momento é seguir colaborando “nun proxecto no que creo firmemente” e traballar “para que se cumpran os documentos que aprobamos milleiros de persoas”. Recoñeceu certas intromisións do aparato estatal e lamentou a existencia de “cuestión que non se están cumprindo como se deben” e a necesidade de que “un partido que cree no estado plurinacional respecte as decisión que se adoptan nos territorios”.
Sobre a súa posible candidatura que hoxe mesmo anunciaba algún xornal como La Voz de Galicia, Breogán Riobóo foi rotundo:”Non toca agora mesmo. Eu non falei con ningún medio de comunicación desde fai días e tería que ser Breogán o que o diga”.