Defende ampliar a confluencia da “esquerda rupturista” e pídelle ao PSOE que abandone o seu estado de “indefinición e contradicción”.
“Eu nunca cuestionaría o camiño da confluencia”
O co-voceiro da Alternativa Galega de Esquerda, Antón Sánchez García defende os pasos que se están dando na esquerda rupturista para “disputarlle a hexemonía ó Partido Popular” e pensa que “AGE xa está superada para mellor por En Marea”, aínda que se amosou partidario de desenvolver “unha política máis participativa e mellorar as estruturas partidarias”.
Nos micrófonos da Radio Galega, o dirixente de Anova, afirmou estar “máis preocupado en sumar que en cambiar de compañeiros”, e valorou o feito que un dos membros da coalición En Marea en Galicia, Podemos “recoñece o dereito a autodeterminación e a plurinacionalidade”. Non quixo afondar nas reflexións de Breogán Riobóo pero comentou que “eu nunca cuestionaría o camiño da confluencia”.
Pídelle ó PSOE que abandone o camiño da indefinición
Con respecto ós representantes de En Marea no congreso, Antón Sánchez sinalou que “temos o reto politico de visibilizarnos no Congreso e podémolo conseguir co grupo confederal”. Para Sánchez hai algo que debe estar moi claro:”O verdadeiro protagonismo está nas persoas e hai que dar unha resposta política a unha demanda social que existe”.
Tamén tivo unha mensaxe para o Partido Socialista, ó que lle dí que “non pode seguir no camiño da indefinición ou da contradicción”. Lamentou que nalgunhas ocasións “as cúpulas do PSOE non son coherentes cos seus militantes e votantes” porque a súa base social “vota con conciencia de esquerdas e de cambio”.