A Alternativa Galega de Esquerda perdeu tres deputadas nesta lexislatura. O BNG mantén o seu grupo e agora é a terceira forza no Parlamento de Galicia.
Unha situación estraña no seo da Alternativa Galega de Esquerda
Moi pouca xente podería pensar en 2012 que o BNG acabaría a lexislatura, sendo a terceira forza política no Parlamento de Galicia. O músculo acadado pola Alternativa Galega de Esquerda nas eleccións autonómicas foi minguando polas propias desavinzas internas. Primeiro Carme Iglesias Sueiro, despois Consuelo Martínez e agora Mónica Rodríguez, que será a substituta de Yolanda Díaz no Hórreo.
Mónica Fernández, vencellada a Cerna como Consuelo Martínez , formará parte do grupo mixto. En febreiro de 2014 foi unha das dirixentes que abandonou Anova, en discrepancia co “erro estratéxico” da alianza con Izquierda Unida nos comicios para o Parlamento Europeo. Nese momento era a encargada de Patrimonio de Anova – Irmandade Nacionalista.
O grupo mixto terá tres representantes
Con esta nova “baixa” , AGE pasa a contar con 6 dos 9 deputados electos. Catro de Esquerda Unida( Juan Fajardo, Eva Solla, Xavier Ron e Ramón Vázquez) e dous de Anova (Xosé Manuel Beiras e Antón Sánchez García). O Bloque Nacionalista Galego mantén o seu grupo de 7 parlamentarios, o Partido Socialista conserva as 18 actas e o Partido Popular os 41 escanos.
Todo isto no treito final da lexislatura, que tamén deberá decidir o novo presidente (ou presidenta) do Parlamento de Galicia logo da renuncia da conservadora Pilar Rojo, que foi elixida, igual que Yolanda Díaz, parlamentaria en Madrid.
