Santa Comba foi o arranque do calendario de mobilizacións promovidas pola Plataforma en Defensa do Sector Lácteo Galego. Na protesta do sábado o alcalde de Mazaricos, Juan Blanco dou lectura a un manifesto que publicamos en Adiante Galicia.
Manifesto
Hoxe, por desgraza, non falamos tan só dunha situación de crise no sector lácteo, estamos a falar dun verdadeiro drama. Os gandeiros ven como os distribuidores levan o seu leite a prezos que nin sequera cobren os custes de produción e baixo ameaza de deixar de recollérllelo. Namentres, a conselleira relativiza o problema, atrevéndose a dicir que a situación non é tan grave.
Noutros países, como Francia, tendo un problema de prezos bastante menor que en Galicia, os gobernos toman medidas eficaces para solucionar o problema con carácter urxente, poñendo 600 millóns de euros sobre a mesa e chegando a acordos coa industria de distribución para mellorar os prezos.
Diante do esforzo levado a cabo polos gandeiros galegos para converterse en punteiros nun sector tan complicado, vemos que a Administración non está á altura das circunstancias. Por elo, dende a Plataforma pola Defensa do Sector Lácteo, non temos outro remedio que mobilizar a toda a sociedade.
Produtores, consumidores, fabricantes de penso, cooperativas, sindicatos, partidos políticos, representantes da industria de distribución e fabricantes de maquinaria e zoosanitarios acordamos unha serie de medidas necesarias e urxentes para solucionar este problema.
ESIXIMOS QUE:
1. Se garanta a recollida de todo o leite producido e prezos que cubran os custes de produción.
2. Que se poña en valor o leite de orixe galega, pasteurizado e ecolóxico e impedir o uso que está facendo a distribución do leite como produto reclamo.
3. Apostar por unha verdadeira negociación colectiva dos elementos do contrato a través das organizacións de produtores tal e como permite o paquete lácteo.
4. Que se desenvolva a figura do mediador, unha figura da administración que debe vixiar que se cumpra a legalidade á hora de formalizar os contractos e que a negociación se produza en condicións de igualdade.
5. Moi importante: recuperar o consumo!, co impulso do programa de leite escolar que permita unha mellora da imaxe do leite e os produtos lácteos e un aumento do seu consumo nun fragmento de poboación máis nova. Involucrar ó Magrama e os distintos prescritores de opinión, médicos, educadores, etc., na consecución deste obxectivo.
6. A posta en valor da Lei da cadea alimentar. A lei non ten medidas de acompañamento que a fagan operativa. Cando se producen desequilibrios no cumprimento da mesma, a AICA é inoperativa xestionando as sancións. As sancións impostas deben ter publicidade suficiente e o importe das multas debe repercutir no colectivo prexudicado.
Ata que o Goberno de Galicia tome medidas eficaces para poñer remedio aos problemas que afogan aos nosos gandeiros non temos outro remedio que continuar coas mobilizacións. Por iso pedimos o peche de comercios, manifestacións e concentracións de tractores ata que a Administración actúe!
A plataforma continuará organizando mobilizacións durante o mes de agosto até que as administracións tomen algún tipo de acordo que se poida considerar como positivo para solucionar os graves problemas polos que pasa o sector.
As próximas mobilizacións programadas serán en Chantada o vindeiro 6 de agosto e no Deza o vindeiro 12 de agosto.
A manifestación en Adiante Galicia
Adiante Galicia ofreceu completa información desta xornada con dúas crónicas e dous vídeos na nosa canle de youtube, Adiante TV., e que enlazamos a continuación como resumo.
