“Matan máis eles do que mataron en París estes bárbaros” afirmou o voceiro da Alternativa Galega de Esquerda, Xosé Manuel Beiras Torrado, en alusión ao Partido Popular e ós enfermos de Hepatite C.
Xosé Manuel Beiras volveu a abrir a fiestra para que entrara un novo temporal de polémica. En referencia a traxedia de París (asasinato do Charlie Hebdo), Beiras amosouse sorprendido polo feito de que non existirá unha conmoción semellante polas mortes de Hepatite C.
“Non se conmociona nin Europa nin o estado español”
“Morren doce persoas cada día, en dous días case o dobre dos mortos da traxedia de París do outro dia pero non se conmociona nin Europa nin o estado español e non lles dan as medicinas” sinalou Beiras nunha rolda de prensa no Parlamento de Galicia.
“Matan máis xente eles do que mataron en París estes bárbaros” engadiu o voceiro de AGE e líder de Anova, en alusión aos gobernos do PP e a problemática dos enfermos de Hepatite C.Na súa comparecencia, Xosé Manuel Beiras augurou que ao Partido Popular “lle queda pouco tempo de goberno” advertindo que “a cidadanía está xa a elaborar alternativas pola súa conta que son onde está a beber Alternativa Galega de Esquerda” .
Beiras desexa que Feijóo acabe no cárcere
Xosé Manuel Beiras volveu a criticar a acción de goberno de Núñez Feijóo, ao que definiu como “un individuo que practica a venda de fume e fariña para narcotizar á cidadanía”. Atacou ao presidente, desexando que acabara no cárcere “como o seu amigo Marcial Dorado”.
Nesta rolda de prensa, Beiras e a vicevoceira, Yolanda Díaz, explicaron as liñas de traballo do grupo parlamentar neste novo ano e explicaron que se esforzarán “pola protección das persoas” ante as política en sentido contrario do goberno galego.
