A asociación Monte Pindo Parque Natural insiste en que o apoio a figura de Parque Natural para o Monte Pindo é maioritario e incluso o PP de Carnota levou esta proposta “nos seus programas electorais“ pero que agora mesmo “non lle interesa defendelo por intereses exclusivamente políticos, pois como agora non gobernan na localidade non poden anotarse o tanto de declaración”.
Fan mención tamén ao respaldo recollido nunha enquisa de Sondaxe para arroupar a súa defensa de denominación de parque natural, algo que tamén comparten a maioría dos partidos políticos:” O PP é quen está a politizar esta cuestión pois é o único partido político galego que aínda non asumiu a petición vecinal”. Lembran que hai 171 entidades que apoian a devandita solicitude.
Desde este colectivo lamentan que a proposta parlamentaria de AGE, defendida por Yolanda Díaz fora rexeitada, como o foron as outras tres iniciativas anteriores do BNG.
Con respecto as acusacións feitas pola deputada Marisol Piñeiro(PP) manifestan que se trata dun “caduco e falso argumento” e consideran “insultante” o feito de que como “se terxiversan as cousas no corrupto sistema político deste país, onde o goberno emanado dos votos do pobo se converte nun goberno contra o pobo, onde unha persona que mañá pode ser inhabilitada para o exercicio da política hoxe pode ser quen vete a petición de miles de cidadáns”, en alusión a Marisol Piñeiro e ao PP.
