Compromiso por Galicia acaba de cumprir dous anos de existencia, e prepara as vindeiras eleccións municipais con boas expectativas.
Dous anos despois de constituirse como partido político e un mes despois do seu congreso, Compromiso por Galicia afronta un novo reto, o das eleccións municipais de maio de 2015, onde a formación que lidera Xoán Bascuas ten un importante exame para certificar a súa consolidación.
A piques de pecharse este 2014, o partido galeguista xa conta con candidatos confirmados nunha ducia de concellos de Galicia entre eles Santiago(Xosé Antón López), Vigo(Miguel Barros), Lalín(Rafael Cuiña), Ourense(Xosé Mosquera) ou en Maceda, onde o terán como cabeza de cartel o actual rexedor, Xavier Oviedo.Antes de rematar o ano celebrarán as primarias no concello de Muros, onde tres dos seus membros exercen coma concelleiros na corporación.
Segundo poido saber Adiante Galicia, o ano arrancará coa elección de novos candidatos na bisbarra coruñesa de Bergantiños. Concretamente en Carballo (3 de xaneiro) e Coristanco(10 de xaneiro). Nesta última data tamén terán lugar as primarias no concello de Ponteareas.
Pero é seguro que a listaxe de candidaturas de Compromiso no país aumentará nos vindeiros meses e de feito os dirixentes de CxG están traballando intensamente con distintos grupos que xa están operativos en concellos das catro provincias galegas e tamén abrindo novas agrupacións noutros puntos.
