Jesús Gómez Antelo, secretario sindical do SIT (Syndicat interprofessionnel de travailleuses) de Xenebra é o protagonista desta «Conversa na Encrucillada» e deste artigo.
Escoita a entrevista
Xosé Manuel Lema
Jesús Gómez Antelo é a historia dun home con inquedanzas políticas que abriu o seu camiño en terras estranxeiras, ata acabar tendo dúas almas, unha galega e outra suíza.Pero este veciño de O Carballal, na parroquia xalleira de Vilamaior é tamén o testemuño de toda unha xeración de emigrantes galegos. Jesús é un libro aberto, coas tapas curtidas polos problemas dos temporeiros e doutros traballadores; e polas horas de lecturas do “código de obrigacións”.
Como nos conta, deixou con pena unha terra, na que estaba incómodo polos seus ideais anarcosindicalistas, e marcado polas súas actividades clandestinas na CNT. Afectado polo feito “de que a xente puidese ser fusilada polas súas opinións”. Despois dalgunhas experiencias que narra na entrevista, este xalleiro acabou nos locais dun sindicato cristián, que foi o xerme da organización, á que aínda pertence hoxe en día, o SIT, sindicato interprofesional de traballadores, localizado no cantón de Xenebra.Negocia convenios colectivos, defende traballadores, axuda con xestións e non perde a súa esencia de activista.
Jesús Gómez é a crónica viva de moitas pequenas loitas:”Un sindicalista ocúpase máis ben do día a día aínda que iso non dá gloria”. Nestas trincheiras sociais o peor é a soidade:”Un sindicalista non pode sufrir só”.Tivo un protagonismo especial no caso das “pensións esquecidas”, que permitiu a traballadores galegos e portugueses de parques e xardíns cobrar un diñeiro que non sabían que lles pertencía. Grazas á iniciativa de Gómez, o asunto chegou nos anos 90 ao programa “Quién sabe donde? de Paco Lobatón.
Jesús está repleto de vivencias e anécdotas. E segue forxando a súa propia biografía nuns tempos, que desde o seu punto de vista, non son os idóneos para buscarse o pan en terras helvéticas, aínda que é consciente da crise que se vive no estado español. Alí coñeceu a outro xalleiro(de Grixoa de Esternande), amigo e alumno aventaxado, Xosé Abelenda, do sindicato Unia.
Sobre todos estes temas sindicais e sociais, sobre Santa Comba, Galicia e distintos asuntos fálanos nesta entrevista que sen ningunha dúbida merece a pena escoitar.Reflexións dun loitador de O Carballal. O sindicalista da gorra.