O Concello de Curtis presentou unha denuncia ante a Garda Civil polo roubo de 1.700 metros do cable de cobre da rede de terra da iluminación pública das marxes da Avenida de Castilla e da Avenida Buenos Aires de Teixeiro. Desde o concello sospeitan que o roubo puido realizarse durante o día, con persoas utilizando o uniforme dalgunha compañía eléctrica.Descoñécese a data do roubo porque a subtracción non afectou ao abastecemento.
Desde o goberno local pídese a máxima colaboración veciñal e tamén da Garda Civil para que se poidan esclarecer os feitos. O concello vai restituír o cableado polo perigo que supón a actual situación. Calculan que o custe da reposición ascende a 6.000 euros.Fontes municipais lembran que fai dúas semanas denunciouse o roubo de parte da varanda da Ponte do Arco. Neste caso a colaboración veciñal impediu que os danos foran maiores. No mes de agosto, os almacéns municipais tamén sufriron o roubo de material, maquinaria e dun vehículo todoterreo. As perdas totais superaron os 15.000 euros.