A Dirección Xeral de Centros premia un proxecto realizado con motivo do vintaecinco aniversario deste centro emprazado na parroquia de Castriz, no concello de Santa Comba.
O proxecto “25 anos de Pepe de Xan Baña” impulsado polo CEIP Plurilingüe Pepe de Xan Baña resultou premiado no III Concurso de Traballos por Proxectos relacionados cos bibliotecas escolares, e que convocou a Dirección Xeral de Centros e Recursos Humanos da Consellería de Educación.Este proxecto, obtivo o premio na modalidade de proxectos documentais integrados. Ademais do recoñecemento, o centro recibirá dous mil euros para melloras na biblioteca.
O proxecto consistiu nun documental e a festa de presentación celebrada no centro. Pero antes houbo un importante traballo onde profesores, alumnos, pais e nais tiveron o seu protagonismo. Os alumnos documentáronse sobre e elaboración de documentais e o mundo audiovisual e tamén sobre a preparación de entrevistas.
Conferencias e entrevistas
Contaron co soporte de varios expertos que ofreceron os seus consellos. Por unha banda, Carmen Rey e Cristina Caamaño, de Mazaricos, que asesoraron aos nenos nas cuestións audiovisuais, e por outra, o director de Adiante Galicia e último responsable de Radio Xallas antes do seu peche, Xosé Manuel Lema, que falou sobre a elaboración de entrevistas.
Despois, os rapaces, coa axuda dos mestres, realizaron as entrevistas para o documental. Polo “estudio de gravación” do colexio de Traba pasaron membros da comunidade educativa de agora e de antes e tamén o exalcalde José Toja Parajó, que gobernaba o concello de Santa Comba cando se inaugurou o centro.O documental foi presentado nunha concorrida festa de convivencia que festexaba o 25 aniversario dun centro dinámico que agora ven de recoller un premio máis que merecido.
O CEIP Plurilingüe Pepe de Xan Baña de Traba-Castriz, organiza moitas actividades ao longo de cada curso escolar. Saídas culturais, sesións de contacontos, actuacións, obradoiros de oficios tradicionais, ou de horta ecolóxica, ou actos concretos en datas sinaladas como o Entroido ou as Letras Galegas.