O próximo fin de semana a localidade de Paiosaco, no termo municipal da Laracha, celebra a Festa das Cereixas, declarada de interese turístico de Galicia.
Esta popular e multitudinaria celebración ten a súa orixe na importante produción desta froita vermella, sobre todo nas parroquias de Soandres e Coiro. As colleitas vendíanse no primeiro fin de semana de xullo na feira de Paiosaco, na parroquia de Lestón. E séguese coa tradición.
As actividades, organizada pola comisión de festas de Paiosaco, contan co apoio do concello da Laracha, da Xunta de Galicia e da Deputación provincial coruñesa, E comezan este sábado 2 de xullo cunha verbena aperitivo coa orquestra Pódium e a discoteca móbil Factory.
Pero o día grande será o domingo 3 de xullo, con centos de postos de cereixas e outros produtos no campo da feira de Paiosaco. A celebración estará amenizada pola charanga Vos Jaláticos. Tamén haberá un concurso de postres de sobremesa co produto que se homenaxea nesta fin de semana, organizado Asociación de Comercio, Servicios e Industria da Laracha(ACSIL).
Ás oito da tarde, actuará a asociación cultural Queiroga, e pola noite terá lugar unha verbena con Nueva Fuerza. Haberá ademais unha sesión de fogos de artificio. A orquestra Nueva Fuerza é irmá do Combo Dominicano, e ten nas súas filas a un dos membros desta formación ata esta tempada, Arodi Llanos.
En Paiosaco esperan este fin de semana a miles de persoas para degustar e mercar cereixas, unha froita, por certo, rica en A, B, C, E, K e PP, en ferro, calcio, magnesio, potasio e xofre.
Fotos cereixas- Turgalicia- Xunta de Galicia