O CEIP Pepe de Xan Baña de Traba (Castriz) cumpriu os seus primeiros 25 anos de existencia cun emotivo acto que reuniu a profesores, pais, exalumnos, alumnos e un amplo número de persoas vinculadas ao centro educativo.
#AdianteTV
Cun sol abrasador e a xente apiñada no interior do recinto e ata un grupo de persoas na entrada, comezou o acto coa presentación a cargo da directora do centro, Mónica Seoane.Unha das veteranas profesoras e relixiosa afincada en Bazar, Carmen Pablos, resumiu a historia do centro a modo de conto. Despois proxectouse un vídeo onde unha serie de persoas contaban detalles destes 25 anos de existencia. Entre eles, o exalcalde José Toja Parajó, ou as profesoras Elisa Montero e Eva García.
Unha alumna, Vanesa, leu unha breve biografía de Pepe de Xan Baña, regaláronse flores brancas a unha serie de persoas que participaron no documental e tamén ao director de Adiante Galicia, e a poetisa xalleira Regina Muñiz recitou uns versos dedicados ao centro.
Ao final os nenos gozaron de xogos inchables, e fíxose un grafiti nunha parede do colexio en recordo do aniversario. Non faltou a actuación dun gaiteiro acompañado por dúas pandereteiras e unha merenda, como broche a unha tarde emotiva de reencontros neste colexio tan dinámico e cheo de iniciativas.Ao acto asistiu a alcaldesa de Santa Comba, María José Pose Rodríguez e tamén a tenente de alcalde de Carballo, Milagres Lantes, que foi docente deste centro.