Beatriz Alvite tomou posesión como primeira tenente de alcaldesa. O alcalde explicou as xestión feitas con respecto ó polígono industrial do Pino do Val.
Beatriz Alvite, primeire tenente de alcalde
O concello de Mazaricos celebrou o pasado venres un pleno con varios asuntos na orde do día. Despois da renuncia do primeiro tenente de alcalde, José Luís Cives, tocaba facer a oportuna reestruturación. Tomou posesión o novo concelleiro do BNG, José Miguel Blanco Martínez, o edil Esteban Pereiro entraba na comisión especial de contas e Beatriz Alvite Novío asumía o posto deixado por Cives.
Aparte doutros asuntos de trámite, a corporación local daba luz verde a saída da asociación Neria. Desde o concello lembraron que o colectivo “non repercute de ningunha maneira no concello e só ocasiona un gasto fixo anual, o cal podería ser destinado a outras asociacións máis activas e que poidan ter incidencia directa no concello”.
Polígono industrial e Plan Xeral
O alcalde de Mazaricos, Juan Blanco explicou as xestión feitas no tema do polígono industrial de Val. A pretensión inicial do equipo de goberno era desenvolver un plan sectorial pero a localización dunha serie de mámoas na contorna, impediron sacar adiante o proxecto.
O concello optou pola contratación dun arqueólogo que fixo unhas prospeccións na zona, que certificaron que as mámoas están fora do recinto. O técnico está elaborando un informe, e nun principio poderíase dar continuidade ó polígono industrial. Blanco tamén comentou que se pretende adaptar o plan xeral á normativa vixente, polo que “nun prazo de aproximadamente dous anos tanto o PXOM como o polígono industrial” estarían aprobados.
O alcalde ofreceu información sobre a nova ordenanza sobre a xestión de camiños, peche de fincas e vertedoiros ilegais, que se vai presentar na vindeira sesión plenaria. Antes terá unha xuntanza cos representantes da oposición.Entre outros asuntos, Blanco Riveiro explicou ós veciños a xestións para a legalización da auga, medidas para o aforro enerxético e a convocatoria de subvencións para autónomos de nova incorporación, que serán abordadas na vindeira sesión plenaria.
O concello de Mazaricos tamén vai habilitar un sistema de comunicación entre veciños ao través do teléfono con Whatsapp 628809761.