Este xoves 4 de febreiro o Consello da Xun tadaba luz verde ao Plan Xeral de Ordenación Municipal do concello de Carballo, e remátase unha historia de anos non exentos de polémica e coa roda administrativa virando máis lenta do que a necesidade aconsellaba.
Beatriz Mato visitou a capital de Bergantiños
A Conselleira de Medio Ambiente, Beatriz Mato asinaba a orde que supón a aprobación definitiva do PXOM carballés logo do visto bo do Consello da Xunta de Galicia. Mato Otero destacou que deste xeito se pon fin “a unha etapa de incertidume urbanística e aporta a seguridade xurídica que o municipio precisa”, sinalando que deste xeito se vai a continuar recuperación da ribeira do río Anllóns ao seu paso polo concello, permitirá a recuperación do litoral e reforzará a posición estratéxica de Carballo, como eixo empresarial a través da ampliación do polígono industrial de Bértoa.
Urbanismo responsable en Carballo
O alcalde de Carballo, Evencio Ferrero agradeceu o esforzo de tódalas persoas e institucións que participaron neste plan xeral que é “un documento de todos e para todos” e que permitirá “o desenvolvemento responsable do urbanismo en Carballo”. Para o rexedor este era “un día de mirar para adiante”.
Xunto a conselleira e o alcalde, asistiron a sinatura, a secretaria xeral de Urbanismo, Encarnación Rivas, a concelleira de urbanismo, Milagres Lantes, o deputado autonómico Aurelio Núñez Centeno, membros da corporación local, persoal municipal e do equipo redactor así como os exconcelleiros de urbanismo, Manuel Andrade Cristóbal e José Antonio Viña Patiño.