Compromiso por Galicia reúnese con dirixentes da asociación de armadores de cerco de Galicia(ACERGA) en Portosín.
“O mar é vital para Galicia, e Compromiso defenderá con unllas e dentes, que os nosos mariñeiros poidan traballar con dignidade e futuro, nun medio protexido e limpo”. Esta foi a declaración do candidato á presidencia da Xunta de Galicia e líder de Compromiso por Galicia, Xoán Bascuas despois dunha xuntanza cos representantes de ACERGA, Juan Blanco, Adriana Casal e Maite García Abeijón.
ACERGA pide un reparto xusto das cotas da xarda e do xurelo
Bascuas comprometeuse a reflectir as propostas no programa electoral de Compromiso por Galicia para as vindeiras eleccións. Unha das demandas fundamentais é a necesidade dun reparto xusto de cotas por tripulante e buque, ou a xestión conxunta da cota galega, establecendo topes de captura por buque e día, que foi a fórmula de xestión tradicional. “Os criterios do chamado histórico no reparto do xurelo e da xarda están afogando a un sector esencial da economía galega, e nós non podemos máis que valorar a súa exemplar loita, seguilos apoiando e comprometernos a reflectir no noso programa electoral estas peticións” manifestou Xoán Bascuas.
Xuntanza moi frutífera para Bascuas
Neste encontro, desde ACERGA achegáronlle ós dirixentes galeguistas o documento “En defensa do sector do mar”, no que se reclama a protección do medio, o saneamento integral das rías, a defensa do sector pesqueiro artesanal e do marisqueo, o apoio para a miticultura e o fomento dos produtos galegos.
Xoán Bascuas cualificou de “moi frutífera” a xuntanza mantida e agradeceu a vontade en defensa dos intereses de Galicia das xentes de ACERGA. Deste xeito, o político galeguista segue a súa rolda de entrevistas para a elaboración do programa. Nesta ocasión, estivo acompañado polo secretario nacional de Compromiso, Manoel Vello Salvado e pola alcaldesa de Muros, María Xosé Alfonso Torres.
