Francisco Jorquera pide unha moción de censura nas rúas ao goberno Feijóo// O Bloque organiza unha manifestación plural e reivindicativa// Manifestación desde a Alameda á praza da Quintana//
O Bloque Nacionalista Galego celebrará o “día da patria galega” nun dos momentos máis complexos da súa historia, en pleno proceso de reflexión, con distintas voces críticas internas, pero co obxectivo de remontar a situación adversa, así o explicou este xoves na Radio Galega o portavoz parlamentario,Francisco Jorquera:”Estou convencido que o BNG non vai desaparecer. O futuro non se pode construír prescindindo do nacionalismo existente”.
Para Jorquera Caselas, Galicia necesita unha referencia propia e neste sentido o BNG está a impulsar unha “refundación sen límites”. Espera que o 25 de xullo haxa nas rúas de Santiago de Compostela “unha moción de censura contra o goberno Feijóo”.
“Galicia viva, soberanía e traballo”
“Galicia viva, soberanía e traballo” é o lema dos actos do Día Nacional que terá como broche unha manifestación que arrincará ás doce do mediodía desde a alameda en dirección á Praza dá Quintana.
“Queremos implicar a todas as persoas e a todos os colectivos que sintan este país, a todos os que acrediten en Galiza como nación que acudan a unha manifestación que sempre foi plural e reivindicativa” manifestou a secretaria de organización, Goretti Sanmartín.
Haberá representantes de 28 paises distintos nos actos organizados por un BNG , que despois dunhas semanas tensas, quere centrarse xa no exame electoral de outubro. Francisco Jorquera mostrábase optimista con respecto ao papel da organización:”O BNG pode desempeñar un papel central para facer posible un acordo parlamentar para que se desprace ao PP do goberno”.
