Poucos meses para o remate das cotas e os políticos discuten.O Partido Socialista acusa a Xunta de non arroupar ós produtores de leite mentres desde o PP lamentan a incoherencia do PSOE e defenden o traballo feito pola conselleira Rosa Quintana.
Pablo García:“Non sei para que queremos una conselleira”
O voceiro de agricultura do Partido Socialista, Pablo García, denunciou a inacción da Xunta de Galicia ante “un dos principais problemas da axenda política”, como é a situación dos gandeiros ante unha posible supertaxa e meses antes do remate das cotas.“O sector está preparado pero a administración non fixo os deberes, como se fixeron noutros países” sinalou García, criticando a falta de solución a situación dos contratos, a necesidade de modificación do paquete lácteo ou a falta de “fórmulas para controlar a produción”.
Os socialistas critican que “tiveron catro anos para facer ben as cousas, e tiñan datos de produción” e lamentan que por falta de reacción, o sector viva con dúbidas.”Non se pode entender que ninguén teña que pagar unha multa e non se pode dar lugar a que nos últimos meses das cotas se especule” apuntou García.Desde o PSOE consideran que aínda se poden tomar medidas urxentes, e que Rosa Quintana “debe de liderar o sector, porque senón non necesitamos conselleira”.
Isabel García:” A Xunta defende os intereses dos gandeiros”
Desde o Partido Popular, a voceira na materia lamentou que “a oposición tente sementar dúbidas e enlouzar o sector”, e pensa que “deberíamos remar todos na mesma dirección”.Isabel García Pacín lembrou que desde a Xunta xa se advertiu dun posible sobrepasamento “que pode supor un risco de supertaxa” pero destacou que a consellería do Medio Rural non deixa de traballar para defende-los intereses dos gandeiros.Para García Pacín “os socialistas non son coherentes. Estaban en contra dos contratos obrigatorios. Antes eran moi longos e agora din que son moi curtos”.
A deputada popular valorou que a administración popular “creou ferramentas como as OPL, porque sempre avogamos por unha organización forte” para negociar os prezos, ou tamén a posta en marcha de programas informáticos como a Xacobea ou medidas como o paquete lácteo, que son moi aproveitables para os produtores.
Isabel García salientou que “A Xunta tamén está apoiando economicamente ao sector e quere que haxa unha estabilidade”, e pensa que os produtores galegos “son competitivos, e fixeron un esforzo na mellora xenética e na modernización das súas explotacións”.
